Na jaane tab kya hoga...

Jab saalon se chalta karwan saanson ka,
ek lamhe mein ruk jaayega.
Jab seene par sir rakhega koi saathi,
aur dhadkan sun naa payega.
Jab chetna samvedna se bhara ye badan;
jad, shav ho jaayega.
Na jaane tab kya hoga…

Kya phir tum aaogi?
Har bair bhula kar k manka,
do aansu tum bhi bahaogi?
Jivit mujhko toh apna na sakien,
kya mrit mujhko apnaogi?
Tumhara aana, apnaana hi priye,
meri tripti ka sadhan hoga…
Jo tum naa aayi toh sochta hu,
naa jaane tab kya hoga…

Kya tum hogi wahan saath unke…
Maa meri jab roegi?
Woh paayegi mujhko har kahin,
Har pal mujhko khoyegi.
Meri tasveer laga kar k rakhegi seene se;
Meri aahat mein jaagegi, raaton mein jab soyegi.
 Tab dilaasa dene kai log aayenge;
Par sahaara dene o priye,
Tumko bhi aana hoga.
Jo tum naa aayi toh sochta hu,
Naa jaane tab kya hoga…

Pita mere kisi kone mein,
kathor ban baithe honge.
Ashru ki asankhya shrankhla ko,
palkon k baandhon par roke honge.
Jab jab daanta h mujko,
uss pal k liye khud par  gussa karte honge.
Tab kya tum pas jaogi unke?
Ki kuch farz mere hisse ka,
tumko bhi nibhana hoga.
Jo tum naa aayi toh sochta hu,
naa jaane tab kya hoga…

Gar yakeen dila do tum abhi,
toh mein sukun se jaaunga.
Raat k chamkile nabh ka,
koi taara mein ban jaunga..
Warna phir darr lagega mujhko
ki gar tum naa aayi aur mein chala gaya,
toh meri choti si duniya ka anjaam na jaane kya hoga.
Jo tum naa aayi toh sochta hu…  naa jaane tab kya hoga.