Yaadein...

kisse pal-pal k, gum k- khushi k...
bewaqt be fazul ki baatein.
ek saajish sab kuch sahi kar dene ki,
jo kuch na bacha karne ko...
toh fariyaadien.
kahin duba h dil, jaise kashti samandar mein,
kinaare par milte h aksar, kuch purze-
yaadein.

mein khud mein jaise duniya samete baitha hu.
zinda yahan hu, par uss duniya mein jeeta hu.
bas palkein giraani hoti hain,
aur hoti hain meri-tumhari,
roz mulakatein...
phir kisse pal pal k baant-te h hum.
karte h befazul ki baatein..
phir tum chali jaati ho.
phir fariyaadein...
phir mein aankhein kholta hu
nam hoti hain..
phir yaadein...


"kuch h.. tum mein -mujhmein..
jo bhula nahi jaata bhulaane par.
aaj shart thi khud se, tumhe yaad na karne ki,
aur jeet rha tha din bhar se,
abhi hara- jo khayal mila tumhara...
sirhaane par."

When they both remembered.. Pehla pyar.

FROM HER DIARY-

'Apne kamre ki khidki khol k toh soyi thi, 

Tum aaye kyu nhi? 

Pehle toh jhat se aa jaate the.. 

Sardi ki raat mein, 

Thand se num hatheli liye. 

Aur mein... Tumhe shawl udha kar, 

Tumhara haath thame,  

tumse sat kar baith jaati thi.. 

Jaan halak mein rehti thi, 

ki maa na jag jaaye. 

Aur sukun dil mein..  

K tum aaye ho... 

Phir chori pakdi gyi- 

Himmat hi nhi hoti thi milne ki tumse.. 

Waise milti bhi kaise.. duur toh chale gye the. 

Jab waqt sa aaya k phir mil paaye.. 

Kuch tum badle, kuch mein.. 

Jo duur hona shuru hue.. bas hote gye... 

Kal raat jaane kyu tumhara khayal aaya.. 

Jaise kisi jhokne mein lipta.. 

Jo jatana bhul gyi thi.. Woh pelha pyar aaya.. 

Toh khidki khol k soyi thi..  

K shayad tum bhi aa jao.. 

Khayal gya nhi h ab tak.. 

Khidki khol k so rhi hu... Aana!"

FROM HIS CELLPHONE DRAFTS-

"Mein tere purane ghar k aage aaj do pal ko ruka tha... 

Teri khidki se laga woh neem.. 

Jispe Chad k chori chupe tujhse milne aata tha.. 

Kuch jyada jhuka tha.. 

Sardi ki raat mein, uspe chadhte chadhte- 

Hatheli num pad jaati thi.. 

Yaad h mujhko.. Kuch gharmahat dene ko.. 

Mera haath thame tu kaise, 

mujhse sat kar baith jaati thi.. 

Kabhi ma k darr se ghabraati.. 

Kabhi keh kar, "mujhe pata tha tum aaoge!" 

muskuraati thi. :) 

Aaj woh band khidki... 

Humari asliyat dikha gyi 

Woh rasta dikha gyi.. Jo ab band h... 

Woh jo mujhe tujh tak le jaata tha... 

Faasle jyada h... h na? 

Kam sochta hu tere baare mein. 

Aaj tere puraane ghar k aage do pal ruka, 

toh tera khayal aaya... 

Sochta hu tu kahan hogi... 

ab bhi kya... Shayad.. khidki khol k soti hogi...  

Mere.. intezar mein... :)"